Mittagswandl/Eisenberg am 23.09.2021

[hoizlandler]

Servus beinand,
am Donnerstog bei allerfeinstem Bergweda am Unternberg gwen. Zerscht vom PP Raffneroim kurz obe und recht gmiatlich auf da Forststraß und durchn Woid, bis dann da 99er-Kurvenweg oganga is. A richtige 3-G-Tour, auf unzähligen Kehren, 99 glangan ned, steil auffe zum Mittagswandl mit Gipfe- und Gedenkkreiz. Danoch zum altehrwürdigen Steinkreuz mit der Jahreszahl 1664 auf da Oimwoad und weida zum Unternberg. Da Eisenberg is a kurzer Abstecher vom Weg, am Anfang a glei wieda 3-G. Desmoi ned obe wia auffe, sondern obe auf da Forststraß zum PP Raffneroim. An schena Gruass vom Hoizlandler